ग्रह दशा बिग्रो क्यारे, देशलाई राहु केतुले छोको छ
लौन धामी झाक्री, डाम्न पर्‍यो देश डस्ने कोको छ

लुतो खोरेत के हो कुन्नी,टन्की रहने कस्तो महामारी
फुटाउ आउ अब, देश भरी पाप भरिएको फोको छ

गिदी कुहिए पछि टाउको के काम, खाली गनाउछ
फाँकौ अब साथी,यहाँ धेरै सडेका बिचराको पोको छ

सियो देखि हात्ती निली सक्यौ अब के नै बाँकी छ र निल्न
सुन्दा पनि तज्जुब लाग्छ घिच्नेहरु अझै कति भोको छ

बारुद बोल्छ बस्ती बस्ती कुजो भको छ पहरा र गस्ती
बुद्ध फेरि शान्ती रोपुन अब बस यही एक धोको छ