सुस्त सुस्त बोल तिमी भित्ताले नि सुन्छ भन्छन
कुरा काटी खुशी हुने आफ्नै मान्छे हुन्छ भन्छन

मन भित्र मन पस्यो रोजाइ कै कुरा थियो हाम्रो
गल्ती के भो पशु पनि आफ्नी जोडी चुन्छ भन्छन

भरोसाको बजारमा विश्वाश नि बेचिन्छ अरे
मुटु सुन्ने मनले नै धेरै जाल बुन्छ भन्छन

जोड कट्टा जान्नु कसो पिरतीको हिसाबमा
मायामा त बरु मुटु मुटुले नै गुन्छ भन्छन

भर गर भनु भने आँट छैन भन्छ्यौ तिमी
डर लाग्छ माया गर्ने जिबन भरि रुन्छ भन्छन